Ný Akurey komin í heimahöfn

Akurey AK 10, nýr ísfisktogari HB Granda, kom til heimahafnar á Akranesi í gærmorgun eftir tólf og hálfs sólarhrings heimsiglingu frá Tyrklandi. Skipið er systurskip Engeyjar RE. Þriðja systurskipið, Viðey RE, var sjósett í gær.

Móttökuathöfn fyrir Akurey AK verður á föstudaginn kemur. Þar verður skipinu formlega gefið nafn og það blessað.

Eiríkur Jónsson, skipstjóri á Akurey, lét mjög vel af skipinu og skrokklaginu. „Þetta er algjör snilld, skipið fer svo mjúkt í ölduna, engin högg eins og maður á að venjast,“ sagði Eiríkur. Hann sagði hreyfingar togarans vera mjög mjúkar. Hægt er að stilla skipið mikið af upp á gang og annað með því að dæla á milli tanka.

Sett verður slægingarlína, karfaflokkari, flokkunarkerfi með tölvusjón og sjálfvirkt lestarkerfi með Rótex-kælikörum um borð í Akurey. Gangi allt eftir áætlun á togarinn að vera tilbúinn á veiðar í september. Áhöfnin af Sturlaugi H. Böðvarssyni AK mun manna Akurey AK.

Reiknað er með að Engey RE haldi til veiða öðru hvorum megin við næstu helgi. Áhöfnin af Ásbirni RE mun manna Engey RE.