Umdeildar rafmagnsveiðar verði bannaðar

Evrópuþingið hefur í dag kallað eftir því að nokkurs konar raflínuveiðar innan Evrópusambandsins verði bannaðar, en þær hafa einkum verið stundaðar í Norðursjó. Veiðarnar hafa þótt umdeildar en í þeim felst að straumi er hleypt á línur, sem svo eru lagðar rétt yfir botni sjávar, í því skyni að hrekja sjávardýr af botninum og í troll fiskiskipa.

Kosið var um málið á þinginu í dag og voru 402 hlynntir banninu en 232 því mótfallnir. Fjörutíu til viðbótar sátu hjá.

„Þetta er stórkostlegur sigur gegn ákaflega skaðlegri gerð af veiðum,“ segir Yannick Jadot, franskur þingmaður Græna flokksins, í samtali við fréttastofu AFP.

Reglur Evrópusambandsins heimila ríkjum þess að útbúa allt að fimm prósent fiskiskipaflotans með þessum sérstöku rafskautum og hefur heimildin einna helst verið nýtt af hollenskum útgerðum.

Framkvæmdastjórn ESB vill halda heimildinni til veiðanna í suðurhlutu Norðursjós og afnema takmörkunina sem miðast við 5%. Karmenu Vella, framkvæmdastjóri ESB í sjávarútvegsmálum, hefur sagt raflínuveiðarnar umhverfisvænni en þær hefðbundnu, þar sem þær dragi úr útblæstri kolefnis og skaði sjávarbotninn minna.

Stjórnin og þingið munu því nú þurfa að komast að samkomulagi um hvað skuli gert.

• Blogga um frétt