Landaði 500 tonnum af síld í nótt

Hoffell SU-80, fiskiskip Loðnuvinnslunnar, lauk í nótt fyrsta túr sínum á árinu. Gekk túrinn vel enda fékkst 500 tonna afli eftir aðeins sólarhring á veiðum. Um síld var að ræða og var henni landað í heimahöfn á Fáskrúðsfirði þar sem hún fer öll til söltunar.

Haft er eftir Bergi Einarssyni skipstjóra, á vef Loðnuvinnslunnar, að síldin hafi verið falleg og væn. Veðrið hafi þá verið gott og túrinn gengið snurðulaust fyrir sig. Að lokinni löndun fer Hoffellið aftur til veiða á síld.

• Blogga um frétt