Eitt íslenskt loðnuskip og sjö norsk

Aðeins eitt íslenskt loðnuskip var á miðunum í gær, en verið var að frysta loðnu um borð í Vilhelm Þorsteinssyni EA norðaustur af Norðfirði.

Önnur uppsjávarskip voru í landi og er beðið frétta af leiðangri Hafrannsóknastofnunar, en sum þeirra eru langt komin með sinn hlut af upphafskvótanum. Þær upplýsingar fengust frá stofnuninni að leiðangrinum lyki væntanlega á morgun eða fimmtudag og að kapp yrði lagt á að hraða sameiningu gagna og úrvinnslu.

Sjö norsk loðnuskip höfðu um miðjan dag í gær tilkynnt Landhelgisgæslunni að þau væru á leið til loðnuveiða í íslenskri lögsögu og einhver þeirra voru byrjuð veiðar norður af landinu.