Aukinn kolmunni skilar milljarði

Aukning kolmunnakvótans um 29 þúsund tonn gæti skilað rúmum milljarði í auknar útflutningstekjur.

Sjávarútvegsráðherra gaf út í gær reglugerð um hámarksafla íslenskra fiskiskipa á kolmunna í ár.

Kvótinn er ákvarðaður 293 þúsund tonn sem nemur 21,1% af þeim heildarafla sem Alþjóðahafrannsóknaráðið (ICES) ráðlagði. Samkvæmt eldri kolmunnasamningi sem ekki er lengur virkur hafði Ísland 16,23% hlutdeild. Í tilkynningu frá ráðuneytinu kemur fram að aukningin í 21,1% endurspegli vegið meðaltal þeirrar aukningar sem önnur strand- og veiðiríki hafa tekið sér í ár. „Við erum ekki að ganga eins langt í aukningu og Evrópusambandið og Færeyingar. Reynum að finna þarna meðalveg,“ segir Jens Garðar Helgason, formaður Samtaka fyrirtækja í sjávarútvegi, í Morgunblaðinu í dag.