Minnast þeirra sem fórust fyrir fimmtíu árum

Fimmtíu ár verða brátt liðin frá sjóslysunum miklu í Ísafjarðardjúpi í byrjun febrúar 1968, en þá fórust 26 sjómenn af tveimur breskum togurum og einum íslenskum vélbáti. Af þessu tilefni verður haldin athöfn um borð í varðskipinu Óðni til minningar um þá sem týndu lífi þennan örlagaríka sólarhring og jafnframt til að minnast þess björgunarafreks sem áhöfnin á Óðni vann. Athöfnin hefst klukkan 16 í dag.

Sex manna áhöfn Heiðrúnar II frá Bolungarvík var á meðal þeirra sem fórust, auk 19 manna áhafnar breska togarans Ross Cleveland, en einn skipverja togarans, Harry Eddom, bjargaðist við illan leik. Sama dag strandaði breski togarinn Notts County á Snæfjallaströnd, en áhöfn Óðins vann hetjudáð þegar hún bjargaði skipverjum hans. Einn þeirra var þegar látinn er Óðinn komst á slysstað.

Óðinn á siglingu. Tveir stýrimenn úr áhöfn skipsins fóru á bát yfir til togarans Notts County.

Fyrir tilstilli áhafnar Óðins, með Sigurð Þ. Árnason skipherra í fararbroddi, varð 18 mannslífum bjargað þennan dag.

Minningarathöfnin fer fram í þyrluskýli Óðins og mun sr. Hjálmar Jónsson fara með minningarorð og Michael Nevin, sendiherra Breta á Íslandi, mun jafnframt ávarpa samkomuna.

Í kjölfarið verður boðið upp á kaffiveitingar í messa skipsins, samkvæmt upplýsingum frá Sjóminjasafninu. Þar mun Gylfi Geirsson, formaður öldungaráðs Landhelgisgæslunnar og fyrrverandi starfsmaður hennar, fjalla um björgunarafrekið sem áhöfn Óðins vann. Óðinn liggur við festar við Sjóminjasafnið í Reykjavík, við Grandagarð 8, og hefur tilheyrt safninu síðan 2008.

• Blogga um frétt