Laxeldisfyrirtæki HB Granda sett á sölu

Laxeldisfyrirtækið Salmones Frisour, sem er að hluta til í eigu HB Granda, hefur verið sett í söluferli. Þetta kemur fram í tilkynningu frá HB Granda. 

HB Grandi á 20% hlut í eignarhaldsfélaginu Deris S.A. í Síle sem á sjávarútvegsfélögin Friosur og Pesca Chile. Félögin reka fiskiðjuver, gera út tvo frystitogara, þrjú línuskip sem frysta aflann og þrjá ísfisktogara. Að auki á Deris fiskeldisfyrirtækið Salmones Friosur S.A. sem rekur laxeldisstöðvar í Síle.

Deris S.A. hefur falið Larrain Vial, fjárfestingarbanka í Síle, að leita eftir óskuldbindandi tilboðum í Salmones Friosur S.A.

Hagnaður af rekstri Deris árið 2016 var 22,5 milljónir evra og áhrif félagsins á rekstur HB Granda voru jákvæð um 4,5 milljónir evra. Hlutdeild HB Granda í afkomu félagsins fyrstu níu mánuði ársins 2017 var jákvæð um 3,1 milljón evra. Bókfært verð eignar HB Granda í Deris S.A. var 22,3 milljónir evra í lok september 2017.

• Blogga um frétt