Loðnuskipin að veiðum á Lónsbugt

„Við höfum séð loðnu á stóru svæði, en hún virðist ekki enn þá vera komin í eiginlegan kökk,“ sagði Bergur Einarsson, skipstjóri á Hoffelli frá Fáskrúðsfirði, um miðjan dag í gær.

Þeir voru þá búnir draga einu sinni, um 220 tonn, og sagði Bergur að lóðningin hefði ekki boðið upp á meira. Hrognafylling loðnunnar var 17,6% og þessa dagana er meiri áhersla lögð á gott hráefni fyrir vinnsluna heldur en stóra skammta, að sögn Bergs.

Þeir voru að veiðum á Lónsbugt og á svipuðum slóðum voru Aðalsteinn Jónsson SU, Börkur NK, Vilhelm Þorsteinsson EA, Ásgrímur Halldórsson SF, Hákon ÞH, Ísleifur VE og Huginn VE. Þarna voru einnig grænlenska skipið Polar Amaroq og færeysku skipin Norðborg, Finnur fríði og Högaberg. Bergur sagði að blíðuveður væri á miðunum.