Tóku skóflustungu fyrir nýju húsi Hafró

Kristján Þór Júlíusson sjávarútvegs- og landbúnaðarráðherra og Jón Gunnarsson þingmaður Suðurkjördæmis tóku í gær fyrstu skóflustungurnar að nýju húsi Hafrannsóknastofnunar, sem rísa á að Fornubúðum 5 í Hafnarfirði.

Þetta kemur fram á vef Hafrannsóknastofnunar, en þar segir að í nýbyggingunni verði 4080 fermetra skrifstofu- og rannsóknarými, tengt 1400 fermetra eldri byggingu þar sem á að vera geymsla, verkstæði og aðstaða til útgerðar. Samkvæmt samningi á stofnunin að fá húsið afhent í maí á næsta ári.

Þegar hefur komið fram að Hafnarfjarðarhöfn hefur boðið út og gengið frá samningi um framkvæmdir við Háabakka, nýjan hafnarkant fyrir rannsóknaskip Hafrannsóknastofnunar. Framkvæmdir við hafnarkantinn munu hefjast í lok sumars og á að vera lokið eigi síðar en 1. maí 2019.

• Blogga um frétt