„Þetta verður spennandi“

„Við vorum að veiðum á Reykjaneshrygg og aflinn var gullkarfi og djúpkarfi. Það fiskaðist afar vel allan túrinn en hann tók 14 daga höfn í höfn þannig að við vorum einungis 10-11 daga að veiðum.“

Þetta segir Bjarni Ólafur Hjálmarsson, skipstjóri á Blængi NK, sem kom til löndunar í Neskaupstað á laugardag með 365 tonna afla. Verðmæti aflans er um 70 milljónir króna og segir Bjarni að veiðiferðin hafi gengið vel.

Í kvöld er svo ráðgert að skipið haldi til veiða í Barentshafi, að því er fram kemur á vef Síldarvinnslunnar. Theodór Haraldsson, sem verður skipstjóri í þeirri veiðiferð, segir að mönnum lítist vel á Barentshafsveiðarnar.

„Þetta verður spennandi enda hefur yfirleitt verið mjög góð þorskveiði á þessum slóðum um þetta leyti árs. Við ættum að vera komnir á miðin á laugardag og það er áætlað að vera þarna að veiðum fram undir sjómannadag. Um borð verður 26 manna áhöfn auk rússnesks eftirlitsmanns,“ segir Theodór.

• Blogga um frétt