Afli íslenskra skipa jókst um 4%

Fiskafli íslenskra skipa í maí var 140.873 tonn, eða 4% meiri en í sama mánuði síðasta árs. Heildarafli á tólf mánaða tímabili frá júní 2017 fram í maí 2018 nam rúmlega 1.271 þúsund tonnum, sem er samdráttur um 3% miðað við sama tímabil ári fyrr.

Þetta kemur fram í tilkynningu frá Hagstofunni, en þar segir einnig að botnfiskafli í maí hafi verið rúm 45 þúsund tonn og dregist saman um 12%, þar af hafi þorskaflinn numið tæpum 26 þúsund tonnum, sem er 8% minni afli en í maí 2017.

Af uppsjávartegundum veiddist nær eingöngu kolmunni, en af honum veiddust rúm 90 þúsund tonn sem er 14% meira en í maí 2017. Skel og krabbadýraafli nam 1.527 tonnum samanborið við 1.381 tonn í maí 2017.

Sjá nánar á vef Hagstofunnar

• Blogga um frétt