Fiskveiðieftirlitskerfi frá íslenska hátæknifyrirtækinu Trackwell hefur orðið fyrir valinu í opnu útboði ástralskra fiskveiðiyfirvalda um kerfi til eftirlits í þessari þriðju stærstu lögsögu heims. Með tækni fyrirtækisins verður hægt að fylgjast í rauntíma með ferðum þeirra 7.000 skipa sem tilheyra áströlsku lögsögunni, sem spannar 8,2 milljónir ferkílómetra.

Útboðið var á vegum Fiskveiðieftirlitsstofnunar Ástralíu og mun Trackwell enn fremur sinna þjónustu og uppfærslum á kerfinu fyrir áströlsk stjórnvöld. Samningurinn við áströlsk stjórnvöld er einn sá stærsti sem Trackwell hefur gert en kerfi þess eru nú þegar notuð víða um heim og þykja í allra fremstu röð á heimsvísu, að því er fram kemur í tilkynningu.  

„Þessi samningur markar viss tímamót hjá Trackwell enda einn okkar stærsti samningur til þessa. Í fyrsta lagi gefur hann okkur möguleikann á að vinna náið með áströlskum yfirvöldum að vöktun skipaumferðar innan þeirra lögsögu og atferli þeirra skipa sem sigla um Kyrrahafið, sem og stóra hluta Indlandshafs og Suður-Íshafs. Í öðru lagi staðfestir samningurinn stöðu Trackwell sem leiðandi þjónustu- og söluaðila fiskveiðieftirlitskerfa á heimsvísu,“ segir Kolbeinn Gunnarsson, sviðsstjóri sjávarútvegssviðs Trackwell.  

„Hugbúnaðarlausnir Trackwell voru valdar úr fjölda útboða þar sem fyrirtækið býður upp á heildstæð og samkeppnishæf kerfi. Okkar starfsemi kallar á stöðuga þróun og mæta kerfi Trackwell okkar fjölbreyttu kröfum,“ segir Jeremy Thuell, framkvæmdastjóri hjá Fiskveiðieftirlitsstofnun Ástralíu.  

Eftirlit víða um höf

Trackwell var stofnað árið 1996 og hefur verið leiðandi í heiminum við hönnun hugbúnaðarlausna fyrir sjávarútveg, sem bæði hafa aukið öryggi sjófarenda og bætt eftirlit við fiskveiðistjórn. Fyrirtækið hefur lengi unnið að þróun hugbúnaðarlausna í nánu samstarfi við Landhelgisgæslu Íslands, Neyðarlínuna og Sjávarútvegsráðuneytið, auk fjölda erlendra viðskiptavina.

Fiskveiðieftirlitsstofnun Ástralíu bætist því í hóp viðskiptavina á borð við Landhelgisgæslu Íslands, Norðaustur-Atlantshafsfiskveiðinefndina, Fiskveiðiráð Kyrrahafseyja og Fiskveiðinefnd Vestur- og Mið-Kyrrahafs. 

Meðfylgjandi er kort af lögsögu Ástralíu.