„Drauganet“ skemmdarvargur lífríkis

Talið er að um 640 þúsund tonn af veiðarfærum sé skilin eftir í sjónum á hverju ári. Í þessum svokölluðu drauganetum festast svo dýr heimshafanna og drepast næstu áratugina.

Greint er frá málinu í frétt á vef Sky-sjónvarpsstöðvarinnar. Þar er m.a. sérstaklega fjallað um áhrif þessarar mengunar á sjóinn undan ströndum Wales. Í Milford Haven í Wales er náttúruleg höfn sem hefur verið nýtt frá miðöldum. En undir yfirborðinu er alls konar rusl, s.s. gildrur sem notaðar eru til að veiða humar sem og net. Í frétt Sky kemur fram að talið er að um 58% af öllu plasti sem finnst í sjónum séu veiðarfæri. Í Milford Haven vinna kafarar að því að fjarlægja ruslið en þetta mikilvæga verkefni er gríðarlega tímafrekt.

Einn kafarinn, Dave Kennard, segir að veiðarfærin hafi ekki aðeins áhrif á fiska og önnur dýr hafsins heldur einnig fugla. Þeir flæki sig í þeim og hengja sig.

• Blogga um frétt