Þýskur drengur þakkaði fyrir fiskinn

Lesendur geta spreytt sig á þýskunni.

Í síðustu viku barst Síldarvinnslunni í Neskaupstað skemmtilegt bréf frá Þýskalandi. Í bréfinu lýsir bréfritarinn, ungur drengur að nafni Hauke Nörenberg frá Cuxhaven, yfir ánægju sinni með fiskinn frá Síldarvinnslunni og sendir fyrirtækinu sínar bestu kveðjur.

Frá þessu er greint á vef Síldarvinnslunnar, en fram kemur í bréfinu að um sé að ræða sjófrystan fisk og kemur fiskurinn því frá frystitogaranum Blængi NK.

„Það er ekki oft sem neytendur hafa fyrir því að þakka fyrir góða vöru með þessum hætti,“ segir á vef fyrirtækisins.