Síldveiðin fer vel af stað fyrir austan

„Við fengum aflann í fjórum holum við og utan við Glettinganestotuna. Þarna var svolítið líf og við toguðum aldrei lengi eða frá tveimur og hálfum og upp í fimm tíma,“ segir Hjörvar Hjálmarsson, skipstjóri á Berki NK, sem kom með 1.200 tonn af síld að landi til vinnslu í Neskaupstað í gær. Hjörvar segir síldina stóra og gullfallega.

„Það má segja að síldveiðin hafi farið vel af stað og síldin er afar heppileg til vinnslu. Þetta er yfir 400 gramma síld,“ segir Hjörvar. Vinnsla gengur vel í fiskiðjuveri Síldarvinnslunnar í Neskaupstað þar sem síldin er flökuð og fryst, að því er fram kemur á vef útgerðarinnar.

Segir þar að Bjarni Ólafsson AK hafi komið til Neskaupstaðar í morgun, eftir aðra veiðiferð hans á síldarmiðin austur af landinu. Aflinn nemur 680 tonnum og verður væntanlega byrjað að vinna hann á morgun.

• Blogga um frétt