„Voru ekki lengi að smella í hann“

Skuttogarinn Ljósafell landaði um 95 tonnum af afla í morgun, en uppistaða aflans var þorskur og ufsi.

Þetta kemur fram á vef Loðnuvinnslunnar, en þar er einnig greint frá því að línubáturinn Sandfell sé aftur byrjaður á veiðum eftir að hafa verið í slipp á Akureyri.

„Þeir voru ekki lengi að smella í hann, skipverjarnir, og var landað 15 tonnum á Siglufirði á sunnudag,“ segir á vef útgerðarinnar. Báturinn sigldi síðan austur og hóf veiðar á Austfjarðamiðum í gær.

Uppsjávarskipið Hoffell landaði þá í gær um 1.050 tonnum af makríl. Verður reyndur einn túr í viðbót.

• Blogga um frétt