Vestfirðingar þekkja það allt of vel að framfaramál í fjórðungnum séu stöðvuð af óljósum tæknilegum ástæðum. Óásættanlegt er að rekstrargrundvelli fyrirtækja þar, sem og annars staðar á Íslandi, sé kippt undan þeim eins og staðan er nú í íslensku fiskeldi.

Þetta segir í bókun bæjarstjórnar Bolungarvíkurkaupstaðar, sem samþykkt var á fundi hennar í síðustu viku.

„Það er ólíðandi að íbúar í Vesturbyggð og Tálknafirði séu skildir eftir í mikilli óvissu og nauðsynlegt að þetta fólk fái afdráttarlausan stuðning stjórnvalda. Nú er málið komið á þann stað að aðgerða er þörf. Það er krafa okkar að tíminn sé vel nýttur til að horfa til framtíðar og til að skapa umgjörð sem gerir fiskeldisfyrirtækjum kleift að vaxa og byggjast upp,“ segir í bókuninni.

„Bæjarstjórn styður fyllilega að gætt sé varúðar við uppbyggingu fiskeldis. Ekki hefur verið farið fram á annað en að uppbyggingin verði í sátt við náttúru og að uppfylltum skilyrðum.“

Bæjarstjórnin skorar á stjórnvöld að beita sér fyrir því að skapa umgjörð um fiskeldi á Íslandi sem gerir því kleift að vaxa til framtíðar, „án sífelldra áfalla, vandamála og uppákoma eins og samfélagið hefur orðið vitni að undanfarna daga og vikur. Fiskeldi er umhverfisvæn atvinnugrein sem hefur alla burði til að vera einn af hornsteinum í vestfirsku og íslensku atvinnulífi til framtíðar.“

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir

• Blogga um frétt