„Ríkir algjör óvissa um loðnuna“

„Við höfum þurft að elta síldina austur eftir og vorum komnir á veiðisvæðið snemma í gærmorgun. Við tókum tvö hol í gær, um 200 til 220 tonn í hvoru, en í dag höfum við ekkert getað verið að veiðum vegna skítabrælu.“

Þetta sagði Hjalti Einarsson, skipstjóri á Víkingi AK, en rætt var við hann í fyrradag og er viðtalið birt á vef HB Granda.

Segir þar að lítið sé eftir af kvóta íslenskra skipa í norsk-íslensku síldinni. Útgerðir margra skipa hafi nú snúið sér að kolmunnaleit fyrir austan land. Víkingur AK er nú í sínum síðasta síldveiðitúr og segir Hjalti að aflinn á þriðjudag hafi verið þokkalegur.

„Það hefur verið ágætur afli og stór og fín síld en tíðarfarið inn á milli hefur verið afskaplega erfitt.“

Auk Víkings er Álsey VE á miðunum. Venus NS er í höfn á Vopnafirði en Hjalti telur að Venus eigi einn síldveiðitúr eftir. Framhaldið er hins vegar óráðið.

„Vonandi finnst kolmunni í veiðanlegu magni og svo er það auðvitað loðnuvertíðin sem allir horfa til. Það ríkir algjör óvissa um loðnuna. Það á frekari leit eftir að fara fram og vonandi skilar hún árangri,“ segir Hjalti Einarsson.

• Blogga um frétt