Ekki boðað til félagsfundar í Sjómannafélaginu
Setja bókamerki
Ekki verður boðað til félagsfundar í Sjómannafélagi Íslands líkt og á annað hundrað manna óskuðu eftir fyrir helgi. Þetta kemur fram í tilkynningu frá félaginu.
Á föstudag skrifuðu 163 undir undirskriftalista þar sem óskað var eftir því að stjórn Sjómannafélags Íslands myndi boða til félagsfundar innan sólarhrings, í ljós grafalvarlegrar stöðu félagsins. Með því var verið að vísa í brottrekstur Heiðveigar Maríu Einarsdóttur formannsframbjóðanda, sem var vikið úr félaginu vegna ásakana á hendur stjórn félagsins. Sérstaklega var óskað eftir því að hún yrði boðuð á fundinn.
Þriðjungur undirskriftanna frá félagsmönnum
Í tilkynningu frá Sjómannafélaginu, sem Jónas Garðarsson, formaður félagsins, skrifar undir, kemur fram að skrifstofa félagsins hafi borið undirskriftirnar 163 saman við félagaskrána og við það kom í ljós að innan við þriðjungur undirskriftanna, 52 talsins, eru félagsmenn. Samkvæmt lögum félagsins þarf stjórn að boða til félagsfundar ef 100 félagsmenn eða fleiri fara fram á það og tilgreina fundarefni. Því hafi verið ákveðið að boða ekki til félagsfundar. Hins vegar verður trúnaðarmannaráð félagsins sem tók ákvörðun um brottvikningu Heiðveigar Maríu kallað saman fljótlega.
„Í þessum þætti fjölmiðlafarsans er sama innistæðan og í öllum hinum. Farið er fram með stórlega ýktar eða upplognar staðhæfingar sem standast enga skoðun en rata í stórar fyrirsagnir áður en þær missa flugið og fjara út,“ segir í tilkynningunni.
Þar segir einnig að Heiðveig María hafi ítrekað borið fram upplognar sakir á forystu félagsins og „skaðað það með vísvitandi og því miður áþreifanlegum hætti.“ Þess vegna var tekin ákvörðun um að vísa henni úr félaginu. Sjómannafélagið áréttar einnig í tilkynningunni að í mati á kjörgengi hennar til framboðs til stjórnarformennsku og brottvikningu úr félaginu hefur í einu og öllu verið farið að lögum og reglum félagsins.
Þá segir í tilkynningunni að á síðustu dögum hafa verið bornar ærumeiðandi ásakanir á forystu Sjómannafélags Íslands um klíkuskap, klæki og fantaskap; ólöglegar lagabreytingar, fölsun fundargerða og að slíta blaðsíður úr fundargerðabók. „Ávirðingar Heiðveigar Maríu hafa komið í veg fyrir löngu tímabæra sameiningu sjómanna sem hún hefur kallað „klikkaðar tilraunir“.“
Að lokum segir í tilkynningunni að Sjómannafélag Íslands verði „ekki yfirtekið með baktjaldamakki og áhlaupi utanaðkomandi fólks.“
Tilkynningu Sjómannafélags Íslands í heild sinni má lesa hér að neðan:
Heiðveig María Einarsdóttir hefur að undanförnu gagnrýnt forystu Sjómannafélags Íslands afar harkalega í fjölmiðlum. Hún hefur ítrekað borið fram upplognar sakir á forystu félagsins og skaðað það með vísvitandi og því miður áþreifanlegum hætti. Þess vegna var tekin ákvörðun um að vísa henni úr félaginu. Það skal áréttað að í mati á kjörgengi hennar til framboðs til stjórnarformennsku og brottvikningu úr félaginu hefur í einu og öllu verið farið að lögum og reglum félagsins.
Efnt var til undirskriftasöfnunar vegna áskorunar um að haldinn yrði félagsfundur. Undirskriftalistinn var sendur til skrifstofu félagsins eftir lokun klukkan fjögur síðastliðinn föstudag. Rúmum sólarhring síðar, eða klukkan tvö að morgni sunnudagsins, sendu aðstandendur söfnunarinnar frá sér harðorð mótmæli vegna þess að félagið hefði ekki kvittað fyrir móttöku listans og brugðist við honum með því að boða til félagsfundar strax þessa sömu helgi. Í fréttum var skýrt frá því að safnast hefðu 163 undirskriftir en samkvæmt lögum félagsins þarf stjórn að boða til félagsfundar ef 100 félagsmenn eða fleiri fara fram á það og tilgreina fundarefni.
Skrifstofa Sjómannafélags Íslands hefur nú borið þessar 163 undirskriftir saman við félagaskrána. Innan við þriðjungur undirskriftanna, eða 52 einstaklingar, eru félagsmenn. Hinir eitt hundrað og ellefu eru það ekki. Í þessum þætti fjölmiðlafarsans er sama innistæðan og í öllum hinum. Farið er fram með stórlega ýktar eða upplognar staðhæfingar sem standast enga skoðun en rata í stórar fyrirsagnir áður en þær missa flugið og fjara út. Bornar hafa verið ærumeiðandi ásakanir á forystu Sjómannafélags Íslands um klíkuskap, klæki og fantaskap; ólöglegar lagabreytingar, fölsun fundargerða og að slíta blaðsíður úr fundargerðabók. Ávirðingar Heiðveigar Maríu hafa komið í veg fyrir löngu tímabæra sameiningu sjómanna sem hún hefur kallað „klikkaðar tilraunir“.
Það verður ekki boðað til félagsfundar í Sjómannafélagi Íslands á grundvelli þessara undirskrifta. Hins vegar verður trúnaðarmannaráð félagsins sem tók ákvörðun um brottvikningu Heiðveigar Maríu kallað saman fljótlega. Um kjörgengi í stjórnarkosningum þarf hins vegar ekki að ræða. Brottvikningin skiptir engu máli hvað það varðar. Þar eru lög félagsins um hið minnsta þriggja ára félagsaðild afar skýr. Félagið verður ekki yfirtekið með baktjaldamakki og áhlaupi utanaðkomandi fólks.
Íslendingar ein einmanalegasta þjóð í heimi
Tæknideild komin norður vegna andlátsins
Mest spennandi kosningar í áratugi
Sáttur við sína stöðu og finnur fyrir meðbyr
Lögreglan rannsakar andlát konu í fjölbýlishúsi
„Mér finnst Halla Hrund svona Vigdísarleg“
Áköf mótmæli í bandarískum háskólum
Katrín: Jóhönnustjórnin talaði máli Íslands