Áhafnir uppsjávarskipanna í jólafrí

Langt er komið með að veiða kolmunnaheimildir ársins og er búið að landa yfir 275 þúsund tonnum í ár. Alls er Íslendingum heimilt að veiða tæplega 315 þúsund tonn að meðtöldum sérstökum úthlutunum og flutningi á milli ára.

Kjarasamningum samkvæmt eiga uppsjávarskipin að vera komin til hafnar um miðja næstu viku og mega ekki fara út aftur fyrr en eftir áramót. Stóra spurningin er hvað verður með loðnuveiðar á nýju ári, en Heimaey VE er nú við loðnuleit fyrir norðan land.

Venus NS og Víkingur AK, skip HB Granda, eru á landleið með kolmunna úr síðasta túr ársins. Unnið er að framkvæmdum í verksmiðju fyrirtækisins á Vopnafirði og því landa þau á Eskifirði. Þar landaði Huginn VE einnig í vikunni. Síldarvinnsluskipin Beitir og Börkur eru á landleið og hafa lokið veiðum í ár. Nokkrir dagar eru síðan Bjarni Ólafsson AK kom til hafnar í Neskaupstað.