Lágu í fjóra sólarhringa undir Grænuhlíð

„Þetta var voðalegur brælutúr og við lágum til dæmis í fjóra sólarhringa undir Grænuhlíð til að bíða af okkur illviðri. Einnig var túrinn styttur vegna veðurs. Hins vegar var alltaf góð veiði þegar gaf og ekkert undan því að kvarta.“

Þetta segir Bjarni Ólafur Hjálmarsson, skipstjóri á frystitogaranum Blængi NK, sem kom til Neskaupstaðar í nótt og mun landa afla sínum á morgun. Afli skipsins er 556 tonn og er ufsi meirihluti aflans.

„Nýju spilin virkuðu strax fullkomlega og breytingar á millidekkinu komu mjög vel út. Í veiðiferðinni veiddum við úti fyrir Norðurlandi, alveg frá norðausturhorninu til Vestfjarða,“ segir Bjarni og bætir við að þeir hafi fært sig til eftir veðri.

Verðmæti farmsins er um 160 milljónir króna en veiðiferðin er sú fyrsta eftir breytingar og lagfæringar sem framkvæmdar voru í Slippnum á Akureyri. Bjarni segir að mannskapurinn sé mjög ánægður með þær breytingar sem gerðar voru.

• Blogga um frétt