Sokkinn í Seyðisfjarðarhöfn

Báturinn Ramóna SU840 er sokkinn í höfninni á Seyðisfirði. Að sögn hafnarvarðar er báturinn heldur stór fyrir smábátahöfn bæjarins og sest því alltaf á botninn í stórstraumsfjöru.

Þegar flæddi inn í gærmorgun fór hins vegar ekki betur en svo að gálgi á stýrishúsinu festist undir bryggjunni með þeim afleiðingum að báturinn sat áfram fastur á botni hafnarinnar.

Báturinn er nú fullur af vatni og þegar flæðir út situr hann áfram fastur á sínum stað. Eigandi bátsins vinnur nú að því að græja dælur og mun freista þess að losa bátinn í næstu fjöru. Til þess mun hann þurfa að fjarlægja gálgann af skipinu.

Ekki er útlit fyrir að báturinn verði fyrir skemmdum öðrum en vatnsskemmdum vegna atviksins.

• Blogga um frétt