Brotthvarf Japans hefur engin áhrif

Brotthvarf Japans úr Alþjóðahvalveiðiráðinu mun ekki hafa áhrif á alþjóðlegar skuldbindingar Íslands um að stunda viðskipti með hvalaafurðir við Japan.

Frétt af mbl.is

Japanir segja sig úr hvalveiðiráðinu

Þetta kemur fram í svari Kristjáns Þórs Júlíussonar, sjávarútvegs- og landbúnaðarráðherra, við fyrirspurn Andrésar Inga Jónssonar, þingmanns VG.

Japanska ríkisstjórnin tilkynnti í desember að þjóðin ætlaði að segja sig úr Alþjóðahvalveiðiráðinu og hefja hvalveiðar að nýju og tekur úrsögnin gildi 30. júní næstkomandi. 

Hafréttarsamningur Sameinuðu þjóðanna tekur ekki til viðskipta með hvalaafurðir og Ísland hefur ekki gengist undir neinar alþjóðlegar skuldbindingar hvað þetta varðar í þeim samningi, að því er kemur fram í svarinu.

Kristján Þór Júlíusson, sjávarútvegs- og landbúnaðarráðherra. mbl.is/Eggert

Í samningum eru ákvæði um að ríki hafi samráð varðandi stjórn og nýtingu lifandi auðlinda í hafinu, þar á meðal hvala. Umtalsvert svigrúm er samt til að hátta samráðinu á ýmsan hátt og í hafréttarsamningi SÞ eru engin ákvæði um að ríki þurfi að vera aðilar að Alþjóðahvalveiðiráðinu til að stunda hvalveiðar eða til að taka þátt í verslun með hvalaafurðir.

Fram kemur í svarinu að milliríkjaverslun með hvalaafurðir takmarkast við þau ríki sem eru ekki bundin af skráningu viðkomandi hvalategunda í fyrsta viðauka CITES-samningsins, sem er alþjóðlegur samningur um viðskipti með tegundir dýra og plantna sem eru í útrýmingarhættu.

• Blogga um frétt