„Var vitlaust veður á suðvesturmiðum“

„Við byrjuðum á að veiða gullkarfa og ufsa á Fjöllunum. Það var vitlaust veður á suðvesturmiðum og það spáði verra veðri og því fórum við beint norður á Vestfjarðamið,“ segir Jóhannes Ellert Eiríksson, skipstjóri á Viðey, sem kom til hafnar í Reykjavík í gærmorgun.

Svokallað páskastopp er nú hafið, en svo nefnist sá tími þegar stórum svæðum, aðallega við sunnan- og vestanvert landið, er lokað vegna hrygningar þorsksins.

Jóhannes Ellert Eiríksson, skipstjóri á Viðey. mbl.is/Árni Sæberg

Verður fróðlegt að sjá hvað gerist

Reynst hefur snúið að veiða þorsk á togaraslóð, að því er fram kemur á vef HB Granda. Við því var brugðist að þessu sinni með því að ljúka veiðiferðinni á Vestfjarðamiðum, en Jóhannes segir að þar hafi verið blíðuveður.

„Við fengum þorsk í kantinum vestur af Halanum og á Strandagrunni. Aflabrögðin voru í lagi en það verður enginn kraftur í veiðinni fyrr en í júní eftir að þorskurinn er genginn út af grunnunum. Hið sama á við um miðin fyrir sunnan. Þorskurinn er allur uppi á grunnunum á stóru svæði sem nú er lokað. Það verður opnað fyrir veiðar nk. sunnudag og það verður fróðlegt að sjá hvað gerist þá.“

• Blogga um frétt