Fyrsta skipið kom að nýjum hafnarbakka

Tímamót urðu í sögu Faxaflóahafna að morgni annars í páskum. Þá lagðist fyrsta skipið að nýjum hafnarbakka utan Klepps í Sundahöfn, en framkvæmdir við hann hafa staðið yfir undanfarin þrjú ár.

Það var hollenskt flutningaskip, Peak Breskens, sem varð fyrst til að leggjast að hinum nýja bakka. Skipið var að koma með vinnubúðir og stóran krana sem notaður verður til að reisa nýjan gámakrana Eimskips, en nýi bakkinn verður aðalathafnasvæði Eimskips í framtíðinni.

Nýi kraninn er væntanlegur til landsins í næsta mánuði og reiknað er með að hægt verði að taka hann í notkun seinni hluta þessa árs.

Hafnarbakkinn er 470 metrar og kostnaður við bakkagerð er áætlaður rúmar 3.000 milljónir króna, að því er fram kemur í Morgunblaðinu í dag.