Samkvæmt nýjum tölum Hagstofunnar nam útflutningsverðmæti eldisafurða 2.162 milljónum króna í mars sem er 112% aukning á útflutningsverðmæti eldisafurða miðað við mars í fyrra í krónum talið. Í tonnum talið var aukningin rúmlega 107%, en alls voru flutt út 2.343 tonn af eldisafurðum í mars samanborið við 1.133 tonn í mars í fyrra.

Einar K. Guðfinnsson sem starfar að fiskeldismálum hjá SFS, segir í samtali við ViðskiptaMoggann að greinilegt sé að fiskeldið sé að ná vopnum sínum nú í ár.

„Það er ýmislegt sem þarna kemur til. Á síðasta ári bættust við tveir nýir framleiðendur í laxeldi og sá þriðji bættist við í byrjun þessa árs. Þannig að í stað þess að það sé einn aðili að framleiða lax til útflutnings þá eru þeir fjórir á þessum ársfjórðungi. Það tekur auðvitað tíma frá því menn fá leyfi fyrir fiskeldi og þar til þetta verður að eiginlegri afurð, og nú eru áhrifin af auknum leyfum að koma fram,“ segir Einar.

Uppörvandi nú á tímum

Hann segir að þessi niðurstaða sé mjög uppörvandi nú á tímum þegar þörf er á auknum útflutningi á fleiri sviðum í atvinnulífinu, og þörf á að skjóta fleiri stoðum þar undir. „Við vitum að það geta komið áföll á öðrum sviðum og því er gott að hafa fleiri stoðir að styðjast við.“

Einar segir að ef eldið er borið saman við aðrar greinar þá hafi hlutfall loðnunnar af heildarútflutningi sjávarafurða verið að meðaltali um 9-10% síðustu 10 ár. Eldisframleiðslan á fyrsta fjórðungi ársins hafi einnig verið 9-10%. „Þannig að segja má að þarna sé að koma stoð í útflutningi sem er álíka og loðnan hefur verið síðasta áratug.“

Hvað markaðshorfur varðar segir Einar þær almennt góðar og markaðsverð hátt. „Álit þeirra sem fylgjast grannt með segja að áframhaldandi eftirspurn verði eftir laxi og laxaafurðum og margir telja að eftirspurnin verði umfram framboð.“

Rætt er við Einar í ViðskiptaMogganum, sem fylgdi Morgunblaðinu í dag.

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir