Mótmæla skerðingu aflaheimilda

Félag makrílveiðimanna segir algjört misrétti í frumvarpi ríkistjórnarinnar um kvótasetningu á makríl og sakar Kristján Þór Júlíusson, landbúnaðar- og sjávarútvegsráðherra, og Lilju Rafneyju Magnúsdóttur, formann atvinnuveganefndar Alþingis, um „augljós hagsmunatengsl.“

Þetta kemur fram í fréttatilkynningu félagsins, sem telur frumvarpið valda því að minnstu útgerðirnar þurfi að taka á sig 45% skerðingu í úthlutuðum aflaheimilda.

„Á síðasta ári fengu þessi skip rúmlega 5.000 tonn úthlutað til veiða en verði frumvarpið samþykkt munu þessar útgerðir sitja eftir með einungis 2.700 tonn. Heimildir þessara útgerða eru færðar að mestu til stórútgerðarinnar og restin fer í opinberan leigupott sem á að bera tvöfalt veiðigjald,“ segir í tilkynningunni.

Unnsteinn Þráinsson, formaður Félags makrílveiðimanna. Ljósmynd/Hólmar H. Unnsteinsson

Með þessu verði smærri útgerðum „gert að borga leigugjald fyrir að leigja þær [veiðiheimildirnar] aftur af ríkinu. Gjaldið ásamt veiðigjöldum nemur tvöföldu veiðigjaldi annarra útgerða,“ og minnstu útgerðirnar munu þá þurfa að lifa við dýrari og áhættusamari rekstur.

Þá segir að stórútgerðin bæti við sig um 15% af kvótanum og að félagslegur pottur fyrir strandveiðimenn stækki um 100%. „Eðlilega eru útgerðir smábáta og skipa sem stundað hafa veiðar á makríl með línu-og handfærum (krókum) brjálaðar yfir þessum tillögum.“

• Blogga um frétt