ÚR kaupir fiskiskip frá Grænlandi

Útgerðarfélag Reykjavíkur hefur gengið frá kaupum á grænlenska fiskiskipinu Aja Aaju, sem smíðað var árið 1988.

Skipið hefur hlotið nafnið Sólborg og verður gert út til netaveiða á grálúðu, að sögn Runólfs Viðars Guðmundssonar, framkvæmdastjóra félagsins.

Félagið verður því með tvö skip í rekstri á næstu misserum, það er Kleifabergið og Sólborgu.

Unnið er að því að gera Sólborgu reiðubúna til veiða og býst Runólfur við að haldið verði á sjóinn öðru hvoru megin við helgina ef allt gengur eftir. Hann bætir við að reksturinn sé ágætur og að veiðar gangi vel.

„Kleifabergið er á landleið frá Rússasjó með fullfermi. Það gengur vel að veiða og það gengur vel að selja.“

„Allir komnir í skotgrafirnar“

Atvinnuvega- og nýsköpunarráðuneytið úrskurðaði fyrr í mánuðinum að Fiskistofa hefði brotið gegn áhöfn og útgerð þegar stofnunin svipti Kleifaberg leyfi til veiða í atvinnuskyni í tólf vikur, vegna meints brottkasts afla.

„Við erum virkilega ánægðir með að því máli sé lokið og að við getum haldið áfram daglegum störfum. Við eigum mikið undir hjá Fiskistofu og það er fínt að geta skilið þetta eftir og litið fram á veginn.“

Runólfur segir mikinn tíma og orku fara í að fylla út eyðublöð og útskýra ýmis mál fyrir fulltrúum stjórnsýslunnar. „Þetta tekur mikið á. Í stað þess að hringja kannski í okkur, spyrjast fyrir og fá greinargóðar útskýringar á jafnvel fimm mínútum, þá er sent formlegt bréf sem þarf síðan að fara í lögfræðiferli og þar fram eftir götunum. Um leið eru þá allir komnir í skotgrafirnar.“