Vilja fá eftirlit með fiskeldinu vestur á firði
Setja bókamerki
„Við viljum fá eftirlit með fiskeldi hingað á svæðið, þar sem eldið er stundað. Það yrði betra fyrir laxeldisfyrirtækin og sveitarfélögin hafa kallað eftir því,“ segir Bjarnveig Guðbrandsdóttir, oddviti Tálknafjarðarhrepps.
Fjöldi starfa hefur skapast við laxeldi í Tálknafirði og Vesturbyggð. Tvær seiðaeldisstöðvar hafa verið byggðar upp í firðinum, Arnarlax í Bæjarvík og Arctic Fish í Norður-Botni en Bjarnveig nefnir þá síðarnefndu Costco Tálknafjarðar vegna stærðar hússins. Þá hafa bæði fyrirtækin hafið laxeldi í firðinum og komið sér upp aðstöðu í þorpinu.
Geta snúið aftur heim
„Fólk fær vinnu við þetta, bæði þeir sem vilja búa hér áfram og þeir sem farið hafa í burtu, til dæmis í fiskeldisnám, og geta nú snúið heim aftur,“ segir Bjarnveig. Hún segir að fiskeldið hafi komið á góðum tíma því það hafi verið áfall þegar Þórsberg lokaði fiskvinnslu sinni á árinu 2015 og seldi kvótann í burtu. Fólk þurfi að hafa vinnu, annars flytji það sig eitthvað annað.
Hún getur þess einnig að mikil umsvif fylgi uppbyggingu fiskeldisins sem nýtist öðrum fyrirtækjum. Fólkið sem við það vinnur þurfi að gista og borða og það hafi hjálpað ferðaþjónustunni.
Á þönum með posann
Bjarnveig er hrifin af hugmyndinni um að íbúar landsbyggðarinnar fái skattaafslátt. Það yrði hvatning til fólks um að flytja út á land. „Það er orðið svo mikið öngþveiti í Reykjavík en slík hvatning gæti orðið til þess að fólk vildi stíga skrefið og flytja út á land,“ segir hún.
Bjarnveig er forstöðumaður íþróttamannvirkja á Tálknafirði og rekstur tjaldsvæðisins fellur undir hennar verksvið. Hún segir að ferðaþjónustan hafi gengið mjög vel í sumar. Þannig hafi verið nærri 4.100 gestir á tjaldsvæðinu í júlí, mest Íslendingar. „Ég var á stöðugum þönum með posann,“ segir hún. Tjaldsvæðið er við sundlaugina og þykir aðstaðan góð. Þannig hafi verið met í aðsókn að sundlauginni marga daga í sumar.
Greinin birtist upphaflega í Morgunblaðinu 16. september.
Á annað hundrað símtala vegna nikótínvara
Mikilvægt að vera á tánum
Mun fara sparlega með málskotsréttinn
Gerir ráð fyrir 150 samningum í næstu viku
Ný staða uppi og óvissan meiri
Aðkoman í gripahúsið mjög slæm
Myndskeið: Segjast hafa skotið niður sprengjuflugvél