Enn utan samkomulags um makrílveiðar

Ekki tókst heildarsamkomulag á milli strandríkja um stjórnun makrílveiða á Norðaustur-Atlantshafi á næsta ári í þriggja daga samningalotu sem lauk í London í gær. Ísland verður því áfram utan samnings á næsta ári.

Kristján Freyr Helgason, aðalsamningamaður Íslands, segir að fljótlega hafi orðið ljóst á þessum fundum að ekki væri vilji til þess að svo stöddu að taka nýja aðila inn í samkomulag um stjórnun veiðanna.

„Við sögðum í upphafi funda að við værum komnir til London með það að markmiði að verða aðilar að samningi,“ segir Kristján Freyr í umfjöllun Morgunblaðsins um þetta mál í dag. „Við formenn sendinefnda Íslands, ESB, Noregs og Færeyja áttum nokkra fundi. Þar viðruðum við sjónarmið og hugmyndir Íslendinga og færðum rök fyrir okkar máli, en það komst síðan ekki lengra. Okkur var fljótlega gert ljóst með skýrum hætti að á þessum tímapunkti yrði samningur þriggja af strandríkjunum; Evrópusambandsins, Noregs og Færeyja, ekki útvíkkaður.“ Kristján Freyr vill ekki ræða einstök efnisatriði í viðræðunum.