Íslensk sjókort opin almenningi á netinu

Landhelgisgæsla Íslands hefur gert íslensk sjókort aðgengileg almenningi með nýjum vefsjá. „Stofnunin hefur á liðnum mánuðum átt í góðu samstarfi við Landmælingar Íslands og notið liðsinnis starfsmanna Landmælinga við að hrinda þessu verkefni í framkvæmd,“ segir í tilkynningu frá gæslunni.

Í tilkynningunni segir að Georg Kr. Lárusson, forstjóri Landhelgisgæslunnar, og Eydís Líndal, forstjóri Landmælinga Íslands, hafi gert „með sér samning á síðasta ári sem fól í sér samstarf stofnananna um aukið aðgengi almennings að rafrænum kortaupplýsingum og endurbættum kortagögnum af strandlínu landsins.“

Sjókortin í vefsjánni eru rastamyndir af íslensku sjókortunum eins og staðan var á útgáfunni á miðju þessu ári. Landhelgisgæslan og Landmælingar segjast í tilkynningunni vona að samfélagið hafi bæði gagn og gaman af þessum aukna aðgangi að sjókortum.

Eydís Líndal, forstjóri Landmælinga Íslands, og Georg Kr. Lárusson, forstjóri Landhelgisgæslunnar. Ljósmynd/Landhelgisgæsla Íslands

• Blogga um frétt