Hættir sem fiskistofustjóri

Eyþór Björnsson fiskistofustjóri hefur verið ráðinn framkvæmdastjóri Samtaka sveitarfélaga og atvinnuþróunar á Norðurlandi eystra. Um er að ræða ný samtök, en í nóvember samþykktu EYÞING, Atvinnuþróunarfélag Eyjafjarðar og Atvinnuþróunarfélag Þingeyinga sameiningu félaganna þriggja undir hatti nýrra samtaka, SSNE. 26 umsóknir bárust um stöðuna.

Eyþór hóf störf á Fiskistofu árið 2006 og hefur verið fiskistofustjóri frá 2010. Hann segist stoltur af störfum sínum á Fiskistofu, en um leið sé hann spenntur fyrir nýju starfi.

„Þetta hefur verið mikill reynslutími og lærdómsríkur sem fiskistofustjóri, en líka skemmtilegur“ segir Eyþór. Fiskistofa hóf flutning höfuðstöðva úr Hafnarfirði til Akureyrar haustið 2015 og var Eyþór þá eini starfsmaðurinn stofnunarinnar sem flutti norður. Formlega hófust flutningarnir 1. janúar 2016. Hann segir að vissulega hafi flutningarnir tekið á, en þeir hafi verið komnir í gegn á um þremur árum og Fiskistofa standi sterk eftir.

Breytingar og endurnýjun

„Stofnunin hefur gengið í gegnum miklar breytingar og mikla endurnýjun. Ég tel að þetta sé góður tími til að skipta um vettvang, bæði fyrir mig og Fiskistofu, og í minn stað kemur nýr fiskistofustjóri með nýja sýn,“ segir Eyþór. Hann segir ekki frágengið hvenær hann láti af störfum á Fiskistofu.

Starfssvæði nýju samtakanna er frá Tröllaskaga og austur í Langanesbyggð og er áformað að starfsstöðvar verði á Húsavík, Akureyri, Tröllaskaga og í Norður-Þingeyjarsýslu.

„Þarna opnaðist tækifæri sem mér fannst mjög spennandi og ég ákvað að sækjast eftir stöðunni þegar ég sá hana auglýsta. Það er mjög spennandi að fá tækifæri til að vinna að hagsmunum landshlutans. Mörg tækifæri, en líka margar áskoranir,“ segir Eyþór.

Eyþór Björnsson er með B.Sc.-gráðu í sjávarútvegsfræði frá Háskólanum á Akureyri, MBA frá Háskóla Íslands og diplomu í opinberri stjórnsýslu frá sama skóla. Einnig hefur hann lokið diplomanámi í alþjóðlegum hafrétti frá Rhodes Academy í Bandaríkjunum.