Fá bara fiskibollur á bolludaginn

„Það er kominn hálfur mánuður síðan við fórum á sjó og hann reiknaði ekki með því að við yrðum þetta lengi þannig að við fáum bara fiskibollur,“ segir Smári Einarsson, stýrimaður á Hoffelli, í samtali við 200 mílur. Hoffell, skip Loðnuvinnslunnar, er á leið til Fáskrúðsfjarðar með fyrsta kolmunnafarminn sem er veiddur á miðunum vestur af Írlandi á þessu ári og nemur hann 1.600 tonnum.

Spurður hvernig veiðar hafi gengið svarar Smári: „Þær gengu bara ljómandi vel á meðan veður leyfði. […] Það er búið að vera bræla í nótt og fyrradag. Við fengum sólarhring í gær. Svo var bræla á fimmtudag og föstudag. Það er bara rysjótt tíðarfar. Við byrjuðum fyrr í fyrra en í ár var búið að vera bræla í heila viku áður en við fórum að fá afla.“

Hoffellið lagði af stað til Íslands í gærkvöldi og á enn eftir talsverða siglingu til heimahafnar. „Þetta eru 800 sjómílur og tekur tíma að sigla heim. Við lögðum af stað átta í gærkvöldi og reiknum ekki með að vera komnir í land fyrr en klukkan tvö á miðvikudaginn. Það tekur 65 til 70 tíma að sigla þetta,“ útskýrir Smári.

• Blogga um frétt