Vilja strandveiðar allt árið og frestun á veiðigjöldum

Forysta Landssambands smábátaeigenda (LS) hefur óskað eftir því við sjávarútvegsráðherra að gerðar verði breytingar á kerfi standveiða vegna kórónufaraldurs.

Sú leið sem LS vill að farin verði er að fjöldi veiðidaga til strandveiða verði óbreyttur, að lágmarki 48. Leyfi gildi í tólf mánuði í stað fjögurra. Upphafsdagur verði áfram 1. maí og engar takmarkanir verði á því hvenær menn kjósa að nýta veiðidagana.

„Það er mat stjórnar LS að með breytingunni verði afkoma þeirra sem stunda strandveiðar eins vel tryggð og hægt er í því ófremdarástandi sem nú geisar. Auk sóttkvíar, sýkingar og veikinda í kjölfarið eru margvíslegir aðrir þættir sem upp kunna að koma. Óvissa er um verð og markaði. Þá kallar strandveiði á fjölmarga þjónustuaðila tengda útgerð hvers báts,“ segir í bréfi LS.

Stjórn LS hefur einnig farið þess á leit við sjávarútvegsráðherra að heimilt verði að fresta greiðslu veiðigjalda með gjalddaga 1. maí og á eindaga 15. maí vegna kórónufaraldursins, að því er fram kemur í Morgunblaðinu í dag.