Viktoría nýr svæðissölustjóri Skagans 3X

Viktoría Alfreðsdóttir hefur verið ráðin í starf svæðissölustjóra fyrir Rússland og Asíu hjá Skaganum 3X. Viktoría er menntaður viðskiptafræðingur frá HR og er einnig með mastersgráðu í vörumerkjastjórnun frá Polimoda í Flórens á ítalíu, að því er segir í fréttatilkynningu frá fyrirtækinu.

Þar segir að ráðning Viktoríu, sem fæddist í Úkraínu og hefur verið búsett á Íslandi um 15 ár og talar því úkraínsku og íslensku ásamt ensku og rússnesku, komi í kjölfar ákvörðunar Skagans 3X um að efla sölunet fyrirtækisins í Rússlandi og á Asíumarkaði. Þá mun hún vinna náið með Pétri Jakobi Péturssyni sölustjóra á fyrrnefndum markaðssvæðum.

Í tilkynningunni segir að ör vöxtur hafi orðið í sölu fyrirtækisins að undanförnu til fyrrnefndra svæða og er bent á að Skaginn 3X lauk nýverið byggingu og uppsetningu á uppsjávarverksmiðju í Rússlandi fyrir JSC Gidrostroy á Shikotan sem er ein Kúrileyja austast í Rússlandi. Þá er fyrirtækið einnig að vinna að smíði fiskvinnslu fyrir VI Lenin í Petropavlosk á Kamtchatka, auk þess að vinna að hönnun, smíði og uppsetningu á fiskvinnslubúnaði í fullkomið vinnsluskip fyrir sama fyrirtæki.

• Blogga um frétt