Kaldaskítur á miðunum síðustu daga

Kolmunnaveiðin við Færeyjar er orðin arfaslök, segir á vef Síldarvinnslunnar. Fram kemur að kolmunnaskipin eru að tilkynna 100 til 200 tonn á sólarhring. Lengi er dregið við þessar aðstæður, eða í um 20 tíma. Þá tekur tvo til þrjá tíma að hífa, dæla og kasta á ný og er því einungis tekið eitt hol á sólarhring.

Haft er eftir Sigurði Valgeiri Jóhannessyni, stýrimanni á Beiti, að það hefur verið „kaldaskítur og jafnvel bræla á miðunum síðustu daga“. Kolmunnaflotinn er staddur austur af Færeyjum nálægt miðlínunni á milli Færeyja og Hjaltlandseyja. Síldarvinnsluskipin, Beitir NK, Börkur NK og Bjarni Ólafsson AK, eru þar öll og toga á sama svæði.

Bent er á að á síðustu árum hefur dregið úr kolmunnaveiðinni þegar líður á maímánuð rétt eins og nú. Hins vegar er staðan önnur þar sem síldarvinnsluskipin eiga eftir að veiða um 30.000 tonn en á svipuðum tíma í fyrra áttu þau eftir að veiða um 20.000 tonn. „Helsta ástæðan fyrir minni veiði í ár en í fyrra er óhagstætt veður á miðunum vestur af Írlandi í febrúar og mars.“

Gert er ráð fyrir að Hákon EA komi til Neskaupstaðar í fyrramálið með 1.700 tonn af kolmunna.

• Blogga um frétt