Bergey og Vestmannaey fengu nöfn

Togarar Bergs-Hugins, Bergey VE og Vestmannaey VE, fengu formlega nöfn sín á goslokahátíð um helgina. Fór fram sérstök athöfn á bryggjunni í Vestmannaeyjum og gafst Eyjamönnum kostur að skoða skipin, að því er segir í færslu á vef Síldarvinnslunnar.

Það var mikil blíða í Eyjum um helgina, eins og víða um land. „Mikil kátína var meðal mannskapsins og vonast menn til að skipin reynist happafley líkt og þau eldri voru,“ segir í færslunni.

Þakkaði áhöfnum og starfsfólki

Það var Gunnþór Ingvason, framkvæmdastjóri Síldarvinnslunnar, sem hélt ræðu við tilefnið, en Síldarvinnslan er aðaleigandi Bergs-Hugins. Þakkaði Gunnþór áhöfnum og öllum starfsmönnum sem komu að smíði skipanna.

sr. Guðmundur Örn Jónsson blessaði skipin og áhafnir. Ljósmynd/Arnar Richardsson

Þá sé forsenda þess að umfangsmiklar fjárfestingar eins og ný skip gangi upp að til staðar sé gott starfsfólk, sterk samfélög og stöðuleiki í starfsumhverfi greinarinnar, að sögn framkvæmdastjórans.

„Það er ekki þrautarlaust að taka svona skip í notkun, en þar hefur reynt á þrautseigju, útsjónarsemi og reynslu áhafna að leysa úr málum.  Hafa þeir gert það með sóma og eiga miklar þakkir skyldar fyrir þolinmæðina því ýmislegt hefur komið uppá á þessum fyrstu mánuðum sem hefur þurft að leysa úr,“ sagði Gunnþór.

Kynslóðaskipti

Lóa Skarphéðinsdóttir og dóttir hennar, Elfa Ágústa Magnúsdóttir, gáfu skipunum nöfn með því að brjóta kampavíns flösku á stafni skipsins. Vekur það sérstaka athygli að það var Lóa og amma Elfu sem sinntu þessu hlutverki við komu forvera skipanna.

Elfa Ágústa Magnúsdóttir gefur Vestmanney nafn Ljósmynd/Óskar Pétur

Það var síðan sr. Guðmundur Örn Jónsson sem blessaði skipin og áhafnirnar. Hann afhenti jafnframt skipstjórunum, Birgi Þór Sverrissyni og Jóni Valgeirssyni sjóferðarbæn sr. Odds V. Gíslasonar á platta sem var komið fyrir í skipunum samkvæmt hefð.

Gísli Jóhannes Óskarsson færði skipstjórunum nýja testamentið að gjöf frá Gideon félaginu.

• Blogga um frétt