920 tonn á rúmum tveimur sólarhringum

Hoffell kom til hafnar á Fáskrúðsfirði í morgun með um 920 tonna afla. Aflinn skiptist þannig að 780 tonn eru makríll og 140 tonn eru síld, að því er fram kemur á vef Loðnuvinnslunnar.

Þar segir að aðeins hafi tekið tvo og hálfan sólarhring að ná aflanum og segir Sigurður Bjarnason, skipstjóri á Hoffelli, að aflinn hafi fengist sunnan við Vestmannaeyjar. Þá sé makríllinn stór og fallegur að sögn skipstjórans, um 500 grömm að meðalvigt.

Sigurður segir þetta gott upphaf makrílvertíðar, en Hoffell hefur yfir að ráða um 10.000 tonna kvóta af makríl. „Ég vildi gjarnan sjá fleiri árganga, minni fiska sem gefur vísbendingu um að fiskurinn sé í endurnýjun, en það er svo sem ekkert að marka það strax.“

• Blogga um frétt