Á kolmunnaveiðum vestur af Færeyjum

Níu íslensk uppsjávarskip voru í gær á kolmunnaveiðum vestur af Færeyjum; Venus NS, Víkingur AK, Aðalsteinn Jónsson SU, Guðrún Þorkelsdóttir SU, Jón Kjartansson SU, Bjarni Ólafsson AK, Ísleifur VE, Börkur NK og Beitir NK. Þá voru Heimaey VE og Huginn VE á leið á miðin.

Samkvæmt upplýsingum frá Ingimundi Ingimundarsyni, útgerðarstjóra uppsjávarskipa hjá Brimi hf., hefur verið heldur rólegt á miðunum síðustu daga. Í gærmorgun fékk Venus þó um 360 tonn eftir að hafa togað í hátt í sólarhring og var kominn með um 2.200 tonn. Ráðgert var að skipið héldi heimleiðis til Vopnafjarðar í dag eftir eitt hol til viðbótar. Veður hefur verið sæmilegt á miðunum síðustu daga.

Aðeins 47 þúsund tonn eftir af kvótanum

Kolmunnaafli ársins nálgast nú 200 þúsund tonn, samkvæmt yfirliti um afla úr deilistofnun á heimasíðu Fiskistofu, en alls er kvótinn 247 þúsund tonn. Af þessum afla hafa rúmlega 11 þúsund tonn verið veidd innan íslensku lögsögunnar, yfir 140 þúsund tonn við Færeyjar og yfir 44 þúsund tonn á alþjóðlegu hafsvæði vestur af Írlandi. Mestur afli í einum mánuði var í maí þegar tæplega 80 þúsund tonn veiddust við Færeyjar.

Frétt af mbl.is

Halda bjartsýnir til kolmunnaveiða