Ekki öruggt að varðskipið Týr fari í rekstur á ný
Setja bókamerki
Tengdar fréttir
Öryggi sjófarenda
Ekki er ljóst hvort varðskipið Týr komist í rekstur á ný í kjölfar bilana um borð. Jafnframt er óvíst hvort Landhelgisgæslan hafi fjármuni til að standa straum af óvæntum kostnaði við lagfæringu á varðskipinu þar sem ekki var gert ráð fyrir útgjöldunum í rekstraráætlun eða fjárlögum.
Eins og Morgunblaðið greindi frá í síðustu viku kom upp bilun í skrúfubúnaði Týs í janúar. Bilunin veldur því að önnur aðalvél skipsins er ónothæf. Landhelgisgæslan hefur upplýst að um er að ræða kostnaðarsama viðgerð og að unnið sé að því að meta mögulegar leiðir til viðgerðar.
Í svari við fyrirspurn 200 mílna segir Ásgeir Erlendsson, upplýsingafulltrúi Landhelgisgæslunnar, að umfang bilunarinnar hafi ekki verið ljóst í upphafi. „Við nánari skoðun í slippnum í Reykjavík kom í ljós að vél sem stýrir skrúfubúnaði skipsins er illa skemmd. Við slipptökuna kom jafnframt í ljós að tveir af tönkum skipsins eru mikið skemmdir sökum tæringar. Bilunin er því meiri en upphaflega var talið.“
Ófyrirséð bilun
Hann segir ekki liggja fyrir hver endanlegur kostnaður viðgerðanna sé, en gera megi ráð fyrir að hann hlaupi á tugum milljóna króna. Spurður hvort stofnunin hafi fjármuni til að standa straum af kostnaði við viðgerðirnar, svarar Ásgeir: „Ekki var gert ráð fyrir þessari ófyrirséðu bilun í rekstraráætunum Landhelgisgæslunnar.“ Ekki fengust frekari upplýsingar um fjármögnunina, en stofnuninni er eins og öðrum ríkisstofnunum óheimilt að gera ráð fyrir rekstrarhalla og er Gæslunni á sama tíma skylt að sinna lögbundnu eftirliti.
Þá er „alls óvíst er hvort og þá hvenær skipið kemst aftur í rekstur Landhelgisgæslunnar,“ segir Ásgeir er spurt er um hversu lengi viðgerðir muni standa yfir. Varðskipinu Þór er því falið að fara með allt eftirlit á hafinu umhverfis Ísland á meðan ástandið varir.
Spurður hvort Landhelgisgæslan meti sem svo að stofnuninni sé fært að uppfylla kröfur um eftirlit og viðbúnað með einu skipi, svarar Ásgeir: „Staðan sem uppi er núna er óæskileg og ljóst að lítið má út af bregða. Í næstu viku er áætlað ýmislegt viðhald á varðskipinu Þór sem gerir það að verkum að viðbragðsgeta skipsins verður skert. Þór fer jafnframt í slipp næsta sumar sem hugsanlegt er að fresta til hausts ef nauðsyn krefur.“
Þurfa þrjú skip og þrjár áhafnir
Eitt skip tiltækt á sjó er í mikilli andstöðu við það sem komið hefur fram í þarfagreiningu og áhættumati Landhelgisgæslunnar. Þar er gert ráð fyrir að ætíð séu tvö varðskip á sjó hverju sinni með sambærilega getu og Þór. „Til að svo gæti orðið þyrfti að hafa þrjú varðskip í rekstri auk þriggja áhafna,“ var haft eftir Georg Lárussyni, forstjóra Landhelgisgæslunnar, í sérblaði 200 mílna í desember 2019.
Almennt er siglingaáætlun stofnunarinnar yfir vetrartímann þannig gerð að eitt varðskip er á sjó í þrjár vikur á meðan hitt er þrjár vikur í höfn. Vegna viðgerða á Tý verður hins vegar aðeins eitt skip sem sinnir eftirliti í fleiri vikur og ekkert skip sem getur leyst Þór af ef eitthvað verður þess valdandi að skipið geti ekki sinnt verkefnum þess.
Tengdar fréttir
Öryggi sjófarenda
Segir óábyrgt að skipta út öllu bankaráðinu
Allar rúður brotnar hjá Fiskikónginum
Niðurstaða MDE kallar á breytingar
„Við eigum hvergi heimili“
Mikil skjálftavirkni á landinu áhyggjuefni
Aðhald, frestun og eignasala
Sat á þaki byggingarinnar þegar eldurinn kviknaði