Munur á Blátindi VE og Sigurfara á Akranesi

Landssamband smábátaeigenda (LS) styður þingsályktunartillögu um viðhald og varðveislu gamalla báta. LS leggur til að við tillöguna bætist að skip og bátar eldri en 50 ára verði framvegis skilgreindir sem forngripir, en í lögum sé þessi skilgreining miðuð við smíðaár fyrir 1950.

LS telur að við val á þeim skipum og bátum sem skal varðveita sé litið til þess hvar þau voru smíðuð og útgerðarsögu þeirra. „Til skýringar skal tekið dæmi, annars vegar um Blátind í Vestmannaeyjum og hins vegar Sigurfara á Akranesi. Blátindur var smíðaður í Vestmannaeyjum og átti alla sína útgerðarsögu á Íslandi. Sigurfari var smíðaður í Hull á Bretlandi og var langt frá því að vera gerður út alla tíð hérlendis,“ segir í umsögninni.

Enginn nýsköpunartogari

Guðjón S. Brjánsson, Guðmundur Andri Thorsson og Oddný G. Harðardóttir eru flutningsmenn þingsályktunartillögunnar, sem er endurflutt. Lagt er til að ráðherrar beiti sér fyrir stofnun sjóðs sem hafi það hlutverk að halda við og varðveita gömul skip og báta. Sjóðurinn njóti árlegra framlaga af fjárlögum, einnig verði stuðlað að þátttöku starfsgreina sjávarútvegsins í verkefninu.

Blátindur VE losnaði upp í óveðri 14. febrúar 2020 og sökk við bryggju. mbl.is/Óskar Pétur Friðriksson

Í greinargerð LS segir meðal annars: „Það er undarleg staðreynd að Íslendingar, sem rekja velmegun sína í nútímanum til þess að sett var tveggja hestafla glóðahausvél í smábátinn Stanley frá Hnífsdal árið 1902, skuli ekki standa betur að varðveislu þeirrar ótrúlegu byltingar sem fylgdi í kjölfarið. Íslendingar sitja uppi með þá staðreynd að ekki einn einasti nýsköpunartogari, hvað þá gufutogari, er til í landinu. Meira að segja afla- og happaskipið Sigurður RE er farið í bræðslupottinn.“

Síðar segir að aðeins einn „alvöru“ vertíðarbátur sé varðveittur, Gullborg RE 38/VE 38 „sem stendur við Sjóminjasafnið í Reykjavík og viðhaldið getur varla talist til fyrirmyndar,“ segir í umsögn LS.

Frétt af mbl.is

Blátindi VE 121 verði ekki fargað