Nýlega var komið fyrir nýju kælikerfi um borð í Þórsnesi SH-109 frá Kælingu ehf. Markmiðið með nýja kerfinu er að skila hagkvæmari og umhverfisvænni laus, að því er fram kemur í tilkynningu frá Kælingu.
Freonið, sem hefur í áraraðir verið notað sem kælimiðill í sjávarútvegi er á útleið, enda óumhverfisvænt efni og fylgir notkun þess nokkur áhætta. Þá er talið að það geti verið dýrt fyrir útgerðir að skipta út eldri freonkerfum.
Í tilkynningunni frá Kælingu fullyrðir fyrirtækið að blendingslausn sem hafi verið komið fyrir í Þórsnesi hafi hins vegar verið ódýrari kostur. Um er að ræða kælikerfi sem nýtir freon og vatnsblandað ammoníak. „Í stað þess að keyra eingöngu Freon um kælikerfi er það einungis notað í litlum afmörkuðum hluta kerfisins. Eldri kælipressur eru yfirleitt notaðar áfram til að kæla kuldaberann niður í allt að -40°C með hjálp varmaskiptis. Ammoníaksblöndunni er svo dælt um lokaðar hringrásir til plötufrysta, lestarkælinga o.s.frv.“
Kælipressur í vélarrúmi Þórsness SH-109 í slipp í Hafnarfirði.
Ljósmynd/Aðsend
Þá fylgi mun minni hætta á freonleka með nýja kerfinu auk þess sem kaupum á freoni fylgja aukin kæliafköst og sparnaður. „Reikna má með að einungis sé notast við 1/6 af því Freoni sem áður var notað um borð. Miðað við kælikerfi um borð í Þórsnesi sem áður notaðist við 1.200 lítra af freoni en notast nú eingöngu við 200 lítra og allt bundið við notkun í vélarrúmi í stað þess að það streymdi um allt skipið í pípum,“ segir í tilkynningunni.
Þórsnesið var tekið í slipp í Hafnarfirði í vor til uppsetningar á kerfinu og fylgir því skjámyndakerfi til stjórnunar og eftirlits. Þá voru eldri frystipressur yfirfarnar og nýttar áfram. Ný kælivél sett á kerfi, sem notuð er þegar skipið er á ferskfiski, lestarhitastigi haldið í 0-2°C. Því þarf ekki að nota stórar frystipressur nema þegar að skipið er á frystingu.
Komið var fyrir nýjum varmaskiptum, lagðar nýjar kælilagnir frá vélarúmi að plötufrystum og lestarkælikerfi. Að lokum var freonmagn minnkað úr 1.200 lítrum í 200.
Plötufrystar og dælur Þórsness SH-109 í slipp í Hafnarfirði.
Ljósmynd/Aðsend