Nýtt Lavango kerfi í Einhamri

Nýverið lauk Lavango ehf. uppsetningu á sjálfvirku karakerfi til bolfiskvinnslu Einhamars Seafood í Grindavík. 

Kerfið var hannað hjá Lavango, í samstarfi við Einhamar, framleiddi og setti upp í vinnslunni. Fyrst karahvolfara í nóvember og svo karaþvottavél með karasnúning og staflara frá Semistaal í Danmörku sem tengt var við karakerfið. 

Karastæðum er skilað inn í karahvolfarann, sem matar hráefni inn í framleiðslu. Ljósmynd/Aðsend

Karakerfið matar sjálfvirkt inn í vinnsluna, bæði stóran og smáan fisk og skilar síðan körunum hreinum og upp stöfluðum er kemur fram í tilkynningu frá Lavango. 

„Kerfið virkar þannig að karastæðum er komið fyrir á inntökuband karahvolfarans. Þá er körunum afstaflað með „de-stacker“ og þannig fer eitt kar í einu inn í karalyftu sem lyftir körunum upp um 2,3 metra.

Þá er karinu hvolfið á ísskiljuband og fer fiskurinn þaðan inn á hausarana. Karinu er þá fullhvolfið á annað færiband sem hangir í lofti vinnslunnar og færir körin yfir í annað rými.

Þar fer karið í karalyftu sem færir það aftur niður og beint inn í karaþvottavél sem eftir stutta stund skilar körunum fullhreinum og klárum til notkunar á ný,“ segir í tilkynningu. 

Karið ferðast úr karahvolfaranum, í lyftu og niður í karaþvottavélina frá Semistaal í Danmörku. Ljósmynd/Aðsend

Alda Agnes, framkvæmdastjóri Einhamars, segir innmötun til flökunar hafa gjörbreyst með tilkomu nýja karakerfisins. 

„Lyftaravinna hefur minnkað til muna og meðferð á afla er betri, innmötun hraðvirkari og sjálfvirk og hráefnið helst því kaldara í gegnum vinnsluferilinn. Hráefninu er ráðstafað í kerfið inni í kæli, þannig að körin standa aldrei fram á gólfi eins og áður gerðist,“ er haft eftir Öldu í tilkynningu. Þar segir hún einnig að körin séu svo hrein eftir karaþvottinn að það sé annar litur þá þeim. 

Jón Hlífar Aðalsteinsson, sölustjóri Lavango, segir í samtali við 200 mílur að nýjung kerfisins felist ekki síst í því að kerfið er heildarlausn og aukin sjálfvirknivæðing. 

• Blogga um frétt