Sjávarútvegsfræðingurinn Gauti Geirsson hefur verið ráðinn framkvæmdastjóri fiskeldisfyrirtækisins Háafells ehf. að því er fram kemur í fréttatilkynningu. Háafell er dótturfélag Hraðfrystihússins Gunnvarar hf.

Fram kemur í tilkynningunni að fram undan sé „mikil uppbygging á vegum Háafells en félagið hefur stundað fiskeldi í Ísafjarðardjúpi frá árinu 2001. Háafell hefur leyfi fyrir 800 tonna eldi á laxi og regnbogasilungi í seiðaeldisstöð sinni á Nauteyri ásamt 7.000 tonna leyfi í sjókvíum í Ísafjarðardjúpi fyrir eldi á regnbogasilungi. Nú er eldi á regnbogasilungi á vegum félagsins á tveimur stöðum í Ísafjarðardjúpi, í Álftafirði og undir Bæjahlíð innan við Æðey. Auglýst hefur verið 6.800 tonna laxeldisleyfi Háafells í Ísafjarðardjúpi og stefnt er að útsetningu fyrstu laxaseiða í Ísafjarðardjúp snemma næsta vor.“

Frétt af mbl.is

Leyfi til laxeldis í Djúpinu í farvatninu

Gauti er 28 ára Ísfirðingur og er með B.Sc.-próf í sjávarútvegsfræðum frá háskólanum í Tromsø og vinnur nú að meistaraverkefni í sömu fræðum sem hann lýkur næsta vor. Þá hefur hann unnið fyrir Háafell frá árinu 2017 sem verkefnastjóri og þekkir því vel til reksturs og starfsemi Háafells.

Gauti er í sambúð með Elenu Dís Víðisdóttur verkfræðinema og eiga þau von á sínu fyrsta barni í sumar.

„Það er mikill fengur fyrir félagið að tryggja okkur starfskrafta Gauta til þess að takast á við áskoranir í ört vaxandi fyrirtæki. Og einstaklega ánægjulegt að vel menntað fólk fái starf við hæfi í heimbyggð. Hraðfrystihúsið-Gunnvör hefur verið með starfsemi hér við Djúp í rúm 80 ár og hyggst vera það áfram. Því er mikilvægt að tryggja okkur gott fólk til starfa að þeim spennandi verkefnum sem fram undan eru í fiskeldi á Íslandi,“ segir Einar Valur Kristjánsson, framkvæmdastjóri Hraðfrystihússins Gunnvarar.

„Það er heiður að fá að taka þátt í þessari uppbyggingu á vegum Háafells. Forsvarsmenn fyrirtækisins hafa undanfarin 20 ár öðlast mikla reynslu af fiskeldi í Ísafjarðardjúpi og vandvirkni þeirra og sýn hafa heillað mig. Ég hlakka til að takast á við þessa áskorun með góðum samstarfsmönnum og er þakklátur fyrir það traust sem mér er sýnt,“ segir Gauti.

Tengdar fréttir

Fiskeldi

Fjárfestingin 115 milljarðar króna

• Bátur Arnarlax verður fyrsti sinnar tegundar
• Lagareldismálið fyrst á dagskrá
• Gera niðurstöður umhverfisvaktana aðgengilegar
• Gagnrýna aðferðir við áhættumat

» Fleiri tengdar fréttir

• Blogga um frétt