74% aflans landað í tíu höfnum

Austfirskar hafnir eru áberandi í löndunartölum síðasta árs og var tæplega þriðjungi alls afla landað í landshlutanum. Mest var landað í Neskaupstað en þangað komu skip með rétt rúm 179 þúsund tonn og eru það tæplega 16% af öllum afla sem landað var á landinu sem nam 1.135 þúsund tonnum.

Athygli vekur að í fimm aflamestu höfnum landsins, Neskaupstað, Vestmannaeyjum, Vopnafirði, Eskifirði og Reykjavík, var landað rúmlega 611 þúsund tonnum eða tæpum 54% af öllum afla. Í tíu höfnum var landað tæplega 834 þúsund tonnum sem eru tæplega 74% alls afla á landinu.

Landanir í höfnum Íslands 2021 mbl.is

Mest var landað af þorski í Grindavík eða ríflega 27 þúsund tonnum. Í þeim fimm höfnum þar sem landað var mest af þorski nam aflinn 103.448 tonnum eða rúmlega 38% þorskaflans sem landað var hér á landi árið 2021. Á eftir Grindavík koma Reykjavík, Siglufjörður, Rif og Sauðárkrókur.

Það eru uppsjávarveiðarnar sem koma austfirskum höfnum ofarlega á listann, en botnfiskur er 88% af afla sem landað er í Reykjavík.

Mest var landað af uppsjávartegundum í Neskaupstað eða tæplega 161 þúsund lestir. Alls nam landaður uppsjávarafli 632 þúsnd tonnum en honum var landað í ellefu höfnum hér á landi. Utan Íslands lönduðu íslensk skip 22,8 þúsund lestum af uppsjávartegundum. Mest í Noregi þar sem íslensk skip komu með 9.146 lestir til hafnar, þar af 7,6 þúsund lestir af síld og ríflega þúsund lestir af makríl.