Ungmenni lærðu um sjávarútveginn

Sjávarútvegsskóli unga fólksins í Neskaupstað starfaði í liðinni viku. Það er Háskólinn á Akureyri sem hefur umsjón með skólahaldinu en það fer fram allvíða á landinu. Alls sóttu 12 nemendur skólann í Neskaupstað en þeir starfa allir í Vinnuskóla Fjarðabyggðar.

Það voru Magnús Víðisson, aðjúnkt við Háskólann á Akureyri, og Katla Svavarsdóttir, nemandi í sjávarútvegsfræðum, sem sáu um skólahaldið í Neskaupstað, að því er kemur fram á vef Síldarvinnslunnar. 

Fram kemur, að Sjávarútvegsskóli unga fólksins eigi rætur sínar í Neskaupstað. Árið 2013 kom Síldarvinnslan á fót skóla sem bar nafnið Sjávarútvegsskóli Síldarvinnslunnar og þegar starfsemin breiddist út breyttist einnig nafn skólans. Um tíma hét hann Sjávarútvegsskóli Fjarðabyggðar síðan Sjávarútvegsskóli Austurlands.

Á árinu 2016 hóf Háskólinn á Akureyri að annast skólahaldið og þá var hann nefndur Sjávarútvegsskóli unga fólksins. Nú er boðið upp á nám í Sjávarútvegsskólanum á Austurlandi, Norðurlandi og í Reykjavík. Þá hefur verið komið á fót fiskeldisskóla sem býður upp á kennslu á Djúpavogi og á sunnanverðum Vestfjörðum og nú stendur fyrir dyrum að koma einnig á fót sjávarlíftækniskóla, að því er segir á vef Síldarvinnslunnar. 

• Blogga um frétt