„Það hefur sýnt sig að plastið er ekki nógu sterkt og viðgerðar- og viðhaldsþörf plastbátanna meiri en reiknað var með,“ segir Þráinn Jónsson, framkvæmdastjóri Skipasmíðastöðvar Njarðvíkur, í viðtali í blaði 200 mílna.

Þráinn var staddur í Tyrklandi þegar blaðamaður náði af honum tali og var hann á leið heim til Íslands eftir stífa fundalotu með samstarfsaðilum í Tyrklandi, þar er verið að smíða skrokkinn á nýjum bát fyrir Stakkavík. Bátar af þeirri stærð sem Stakkavík hefur pantað eru í dag nær eingöngu smíðaðir úr plasti og segir Þráinn að því fylgi verulegir kostir að nota stál í staðinn. „Með því að smíða skrokkinn úr stáli erum við með bát sem er einfaldlega í allt öðrum gæðaflokki,“ útskýrir Þráinn

Þó skrokkurinn sé smíðaður í Tyrklandi er það Skipasmíðastöð Njarðvíkur sem mun sjá um að fullklára bátinn.

„Báturinn er lengstur 13,68 metrar og breiðastur 5,6 metrar og verður skrokkurinn fluttur með skipi til Íslands. Þar tökum við til við lokafráganginn og komum t.d. fyrir öllum vélbúnaði og vinnslutækjum; spilbúnaði og björgunarbúnaði, og látum votta haffærni bátsins áður en hann er afhentur kaupanda,“ segir Þráinn.

Viðtalið við Þráin má lesa í 200 mílum, sérblaði Morgunblaðsins um sjávarútveg.

Tengdar fréttir

Endurnýjun skipaflotans

Unnið hörðum höndum í nýjum Hákoni

• Ætla að smíða tvö ný fiskiskip
• Togurum fækkaði um þrjá
• „Erum hvergi nærri af baki dottin“
• Sjósettu nýjan Hákon ÞH í Póllandi

» Fleiri tengdar fréttir