Samherji Holding ehf. hagnaðist um 53,7 milljónir evra á árinu 2021, eða því sem nemur 8,1 milljarði íslenskra króna, sem er töluvert betri afkoma en árið 2020. Það ár hagnaðist félagið um 27,4 milljónir evra eða því sem nemur 4,1 milljarði króna.
Þetta kemur fram í ársreikningi sem samþykktur var á aðalfundi félagsins í gær.
Tekjur samstæðunnar námu 49,5 milljörðum
Tekjur samstæðu Samherja Holding ehf. af seldum vörum námu 327,7 milljónum evra, eða því sem nemur 49,5 milljörðum króna á árinu 2021 samkvæmt rekstrarreikningi. Er þetta aukning frá fyrra ári þegar þær námu 309 milljónum evra eða því sem nemur 46,6 milljörðum króna.
Eignir samstæðunnar voru 645,2 milljónir evra í lok árs 2021, eða 97,4 milljarðar íslenskra króna, og eigið fé nam 439 milljónum evra eða 66,3 milljörðum króna. Eiginfjárhlutfall samstæðunnar var 68% í árslok, að því er fram kemur á vef Samherja.
Stjórn félagsins óbreytt frá síðasta aðalfundi
Helstu eignir Samherja Holding ehf. eru fyrirtæki á sviði veiða, vinnslu og sölu sjávarafurða í Evrópu og Norður-Ameríku en mikill meirihluti eigna félagsins er erlendis. Þá hefur Samherji Holding ehf. einnig fjárfest í flutningastarfsemi og er stærsti hluthafinn í Eimskip hf.
Ársreikningur Samherja Holding ehf. var endurskoðaður og áritaður án fyrirvara. Á áðurnefndum aðalfundi Samherja Holding ehf. fór fram stjórnarkjör í félaginu og voru Eiríkur S. Jóhannsson, Helga Steinunn Guðmundsdóttir, Kristján Vilhelmsson, Óskar Magnússon og Þorsteinn Már Baldvinsson kjörin í stjórn. Er stjórn félagsins því óbreytt frá síðasta aðalfundi.