Endurvinnsla liður í sjálfbærri nýtingu

„Endurvinnsla veiðarfæra er mikilvægur liður í því að tryggja sjálfbæra nýtingu auðlindarinnar og góða umgengni við hafið,“ segir Hildur Hauksdóttir, sérfræðingur í umhverfismálum hjá Samtökum fyrirtækja í sjávarútvegi (SFS), í aðsendri grein í Morgunblaðinu í dag

Vekur hún athygli á að SFS hafi tekið í samstarfi við íslenskar veiðarfæragerðir, tekið í notkun nýtt og endurbætt skilakerfi veiðarfæra.

„Samkvæmt fyrri framkvæmd samdi SFS við eina móttökustöð, sem staðsett var í Reykjavík. Nú hafa hins vegar stærstu veiðarfæragerðir landsins, ásamt nokkrum netaverkstæðum útgerða, gengið til liðs við skilakerfið. Þetta hefur í för með sér umfangsmikla fjölgun móttökustöðva en alls hafa 14 nýjar móttökustöðvar verið opnaðar við helstu fiskihafnir um land allt. Móttökustöðvar eru því í mikilli nálægð við meginþorra handhafa veiðarfæraúrgangs, sem stuðlar að auknum skilum og endurvinnslu,“ skrifar Hildur.

Frétt af mbl.is

Hefja samstarf um endurvinnslu veiðarfæra

Mikill meirihluti veiðarfæraúrgangs sem fellur til á ári hverju fer í endurvinnslu og er hann „aðallega fluttur til endurvinnslu í Litháen, Danmörku og Hollandi. Góður árangur hefur náðst í endurvinnslu og afurðir fara m.a. í bílaiðnað, húsgögn og hátískuiðnað, svo fátt eitt sé nefnt. Ekki eru öll veiðarfæri endurvinnanleg en unnið hefur verið að því síðustu misseri að stórauka möguleika til endurvinnslu og bættust nýjar leiðir inn í kerfið í lok síðasta árs,“ útskýrir hún.

Lesa má grein Hildar í heild sinni í Morgunblaðinu.

• Blogga um frétt