„Það er verið að minnka þann mikla skaða sem ákvörðun hennar hefur þegar valdið,“ segir Vilhjálmur Birgisson, formaður Verkalýðsfélags Akraness, varðandi ákvörðun matvælaráðherra um að framlengja ekki veiðibann á langreyðum sem rennur út á miðnætti.

Segir Vilhjálmur það fagnaðarefni að Svandís Svavarsdóttir matvælaráðherra hafi séð að sér og hyggist heimila veiðarnar frá og með morgundeginum. 

Matvælaráðherra boðaði í dag nýja reglugerð varðandi veiðar á langreyðum og var veiðibann sem rennur út á miðnætti ekki framlengt.

Þá segir í tilkynningu stjórnarráðsins að reglugerðin muni fela í sér „ít­ar­leg­ar og hert­ari kröf­ur til veiðibúnaðar, veiðiaðferða og aukið eft­ir­lit. Skil­yrðin snúa m.a. að þjálf­un, fræðslu, veiðibúnaði og veiðiaðferðum“.

Frétt af mbl.is

Hvalveiðar heimilaðar með takmörkunum

Vilji starfsmanna að fækka frávikum

Spurður hvort hann óttist að kröfur ráðherra verði of íþyngjandi fyrir starfsmenn, t.d. þær sem lúti að aukinni fræðslu og þjálfun, kveðst Vilhjálmur ekki hafa áhyggjur af því. 

„Það er örugglega fullur vilji starfsmanna Hvals, og þeirra sem starfa á hvalskipunum, að fækka frávikum sem verða við veiðarnar. Ég held að þeir muni að mínu mati ekki gera neinar athugasemdir við það að þjálfun eigi sér stað.“

Hann segir það aftur á móti athugavert að sjá ákvörðun Svandísar núna í kjölfar skýrslu starfshóps ráðuneytisins sem gefin var út á mánudag, en Vilhjálmur segir skýrsluna vísa í tillögur Hvals til úrbóta til að fækka frávikum, sem hafi legið fyrir í júní. 

Frétt af mbl.is

Starfshópur segir mögulegt að bæta veiðiaðferðir

Braut að öllum líkindum stjórnsýslulög

„Fagráð sem skilaði nú inn heilum tveimur A4-blöðum í áliti, sem ráðherra byggði veiðibann sitt á, höfðu ekki einu sinni samband við Hval,“ segir Vilhjálmur og bætir við að sennilegast hefði verið hjá þessu öllu komist ef fagráð hefði haft samband við Hval í tengslum við álit sitt. 

„Það er dálítið undarlegt að sjá matvælaráðherra vitna í skýrslu sem staðfestir það að Hvalur er búinn að vera að vinna að tillögum til úrbóta á þessum veiðum,“ segir hann.

„En vinnubrögð hennar voru auðvitað með þeim hætti að hún gætti ekki að andmælarétti starfsmanna og fyrirtækisins til að kanna hvort fyrirtækið væri að vinna að slíkum úrbótum og fagráð gerði það svo sannarlega ekki,“ segir Vilhjálmur og bætir við að ráðherra hafi að öllum líkindum gerst brotleg við stjórnsýslulög með ákvörðun sinni. 

Á heima innan veggja Alþingis

Nú rennur veiðileyfi út um áramótin að vana, hver telur þú að framtíðin verði? Áttu von á að Svandís leyfi veiðar á næsta ári? 

„Það er góð spurning. Fyrst og fremst snýst þetta mál ekki um það núna hvort fólk er með eða á móti hvalveiðum. Þetta snýst um það stjórnvaldsofbeldi sem matvælaráðherra beitti í þessu máli.“

Vilhjálmur segir málið eiga heima innan veggja Alþingis í framhaldinu enda sé það veigamikið mál að taka ákvörðun um hvort heimila eigi hvalveiðar á Íslandi eða ekki. Það eigi ekki að vera háð pólitískum duttlungum matvælaráðherra.

Frétt af mbl.is

„Ég fékk engin önnur viðbrögð en góð“

Tengdar fréttir

Hvalveiðar

Kvartar til umboðsmanns

• Segir gjaldþrot Skagans vera áfall og skýtur á VG
• Hvalurinn er ekki að éta neitt megrunarkex
• Ráðuneytið skammti mismunandi gögn
• Afrán hvala tvöfaldast á þessari öld

» Fleiri tengdar fréttir

• Blogga um frétt